२७ माघ, वीरगञ्ज । निर्माण व्यवसायीहरुले स्थानीय तहहरुले टेण्डरको सूचना लुकाएको आरोप लगाएका छन ।
आइतबार आयोजित पत्रकार सम्मेलनमा निर्माण व्यवसायी संघ पर्साले स्थानीय तहले स्वच्छ प्रतिस्पर्धा हुन नदिन टेण्डरको सूचना लुकाउने गरेको बताएका हुन् । उनीहरुले केही निर्माण व्यवसायी र पत्रिका सञ्चालकको समेत मिलेमतो रहेको आरोप लगाएका छन् ।
टेन्डरको सूचना लुकाउँदा अपारदर्शिता बढेको संघले बताएको छ । स्थानीय तहका पदाधिकारीले कमिसनको लोभमा पत्रिका सञ्चालकलाई मोटो रकम दिएर टेन्डरको सूचना लुकाएको संघको दावी छ ।
निर्माण व्यवसायी संघ पर्साका अध्यक्ष रामकान्त चौरसियाले स्थानीय सरकार आएपछि गाउँबाटै काम पाउँछौं भन्ने सोचेको तर उल्टो भएको गुनासो गरे । 'स्थानीय सरकार आएपछि गाउँमै सरकार आयो, गाउँमै काम पाउँछौं भन्ने लागेको थियो' अध्यक्ष चौरसियाले भने 'तर त्यसको उल्टो भएको छ, पालिकाहरुले सूचना लुकाइरहेका छन् ।'
निर्माण व्यवसायी रमेश पाण्डेले स्थानीय तहमा आफ्नो मान्छे पाल्ने हिसाबले काम भइरहेको भन्दै विरोध जनाए । '०७४ पुस २९ गते सबै स्थानीय तहका प्रमुखहरुलाई बोलाएर छलफल गरेका थियौं, उहाँहरु सकारात्मक हुनुहुन्थ्यो' उनले भने 'तर अहिले छोटे राजा भइसकेका छन्, कानुन बनाएर विकास निर्माणका काम गर्नुपर्नेमा मान्छे पाल्ने हिसाबले भइरहेको छ ।'
उनले कामका लागि स्वस्थ प्रतिस्पर्धाको वातावरण सिर्जना गर्नुपर्ने बताए । 'जुन ठेकेदारले कामको जिम्मा लिएर काम गर्दैन, कारबाही गर्नुपर्छ, हामी त्यसमा बाधक बन्दैनौं' पाण्डेले भने, 'टेन्डरको सूचना लुकाएर स्वस्थ प्रतिश्पर्धाबाट वञ्चित गर्ने, स्थलगत निरीक्षण नगरी स्टिमेट गर्ने जस्ता कार्यहरु बन्द हुनुपर्छ ।'
निर्माण व्यवसायी सुरेश प्रसाद साहले विगतमा टेन्डर भर्नका लागि निर्माण व्यवसायी संघको स्वीकृति लिनुपर्ने भए पनि हाल त्यसलाई हटाएकाले विकृति सुरु भएको दावी गरे ।
जगरनाथपुर गाउँपालिकाले माघ १० गते स्थानीय एउटा पत्रिकामा दुई करोड भन्दा बढीको योजनाको टेन्डर गरेर ठेकेदारसँगको मिलेमतोमा सूचना लुकाएको संघले आरोप लगाएको छ ।
जगरनाथपुर गाउँपालिकाका प्रमुख जालिम मियाँले भने पत्रिकामा सार्वजनिक रुपमा सूचना प्रकाशन गरे पनि निवेदन नआएकाले ठेक्का स्थगित गरेको जानकारी दिए ।
प्रतिक्रिया