मातेर प्रहरीलाई बर्दीमै कुटपिट गर्ने तीन जना पक्राउ

माघ ३, २०७५ हेटौंडा : मकवानपुरको इन्द्रसरोबर गाउँपालिका ३ स्थित सिस्नेरीमा स्थानीय युवाको कुटपिटबाट एक प्रहरी जवान घाइते बनाउने तीनजनालाई  प्रहरीले पक्राउ गरेको छ। मादक पदार्थ सेवन गरी सिस्नेरी बजारमा होहल्ला गरिरहेको समयमा उनीहरूलाई सम्झाउन खोज्दा तीनजना स्थानीय युवाले पोशाकमै रहेका प्रहरी जवान देवीलाल ठाकुरमाथि निर्घात कुटपिट गरेका थिए। मदिरा खाइ मातेका युवाले बुधबार साँझ करिब ६ बजेको समयमा सिस्नेरी प्रहरी चौकीबाट ड्युटीमा खटिएका प्रहरी जवान ठाकुरमाथि कुटपिट गर्दा उनको आँखीभौंमा गम्भीर चोट लागेको छ। स्थानीय स्वास्थ्य चौकीमा उनको आँखीभौंमा चार टाँका लगाइएको प्रहरी सहायक निरीक्षक राजेन्द्रबहादुर रानाले जानकारी दिए। कुटपिटमा संलग्न माइकल बल, दीपेन्द्र बल र  छेवन लामालाई प्रहरीले पक्राउ गरेको छ। उनीहरूलाई पक्रिएर बिहीबार दिउँसो जिल्ला प्रहरी कार्यालय मकवानपुरमा बुझाइएको सहायक निरीक्षक रानाले बताए। मकवानपुरका प्रहरी नायव उपरीक्षक यज्ञप्रसाद भट्टराईले तीन युवालाई सार्वजनिक हित तथा नैतिकताविरुद्धको अपराधमा अदालतमा मुद्दा दर्ता गर्ने तयारी भएको बताए।