१७ पुस, वीरगञ्ज । सिराहाको गोलबजारबाट स्वतन्त्र तराई निर्माण सेनाको पर्चा र हतियार सहित एक जना पक्राउ परेका छन् । सिरहाको धनगढी माइ नगरपालिका–११ छपराडी बस्ने ४६ बर्षका चतुरनारायण चौधरी पर्चा र हतियारसहित पक्राउ परेका हुन् ।
सिरहाको गोलबजार नगरपालिका– ४ मा पूर्वबाट पश्चिम तर्फ जाँदै गर्दा चौधरीले चढेको स ५ प ३७४१ नम्बरको मोटरसाइकल चेकजाँच गर्दा हतियार फेला परेको थियो । उनको साथबाट एसएमजी हतियार १ थान, त्यसमा लाग्ने म्याग्जिन २ थान र ५ राउण्ड गोली बरामद भएको प्रदेश २ प्रहरी कार्यालयका सूचना अधिकारी प्रहरी नायब उपरीक्षक दानबहादुर थापाले जानकारी दिए ।
चौधरीले बोकी ल्याएको कालो रातो रंगको झोला चेकजाँच गर्दा हतियार र २ थान पर्चा फेला परेको उनको भनाइ छ । प्रहरीले हतियार सहित, सवारी चालक अनुमति पत्र, मोबाइल, स्वतन्त्र तराई निर्माण सेना केन्द्रिय ब्युरो लेखिएको पर्चा बरामद गरी अनुसन्धान पक्रिया अघि बढाएको छ । चौधरीविरुद्ध हातहतियार खरखजाना ऐन अन्तर्गत मुद्धा दर्ता गरिएको जिल्ला प्रहरी कर्यालय सिराहाले जनाएको छ ।
प्रतिक्रिया