बिना रोकटोक सीमावर्ती भारतीय बजारमा ओहोरदोहोर गर्दै आएका नेपाली सवारी
साधनले यही सोमबारदेखि 'प्रवेश अनुमति' लिएर मात्र जान पाउने छन् ।
नेपाल–भारतका २३ वटा व्यापारिक नाकामा यो नियम लागू गरिएको रक्सौल
कस्टमले जनाएको छ । भारत सरकारले नेपाली नम्बरका मोटरसाइकललगायतका सवारी
साधन एक दिन प्रवेश गर्दा पनि प्रवेश अनुमति अनिवार्य गरिदिएको छ ।
सुरक्षा दृष्टिकोण र सीमा आवागमनलाई व्यस्थित गर्नका लागि यो प्रावधान
लागू गरिएको रक्सौल कस्टमका अधिकारीले बताएका छन् । सीमा शुल्क विभाग
पटनाले गत डिसेम्बर २९ मा जारी गरेको पब्लिक नोटिस अन्तर्गत नियम लागू
गरिएको हो । रक्सौल कस्टमका एडिसनल कमिशनर कमलेश कुमारका अनुसार
सोमबारदेखि लागू हुने नयाँ नियम अन्तर्गत अस्थाई पास लिएका नेपाली सवारी
साधन ३ किमी भित्रसम्मको सीमावर्ती भारतीय बजारसम्म जान पाउँनेछन् ।
त्यही दिनदेखि सीमामा पास उपलब्ध गराइने उनले बताए ।
पास नलिई प्रवेश गरेको पाइएमा जरिवाना गरिने र सवारी जफत समेत गर्ने
सकिने भारतीय अधिकारीले बताएका छन् । थप अवधिका हकमा सवारी धनिले
वीरगन्जस्थित महावाणिज्य दूतावासबाट अनुमति लिनुपर्ने छ । नाकामा
सीसीटीभी मार्फत निगरानी समेत बढाइएको छ । छेटी भन्सार र ग्रामीण नाकाबाट
प्रवेश नगरी मूख्य नाकाबाटै सवारी लिएर प्रवेश गर्न उनले बताए ।
सीमावर्ती बजार, रेल्वे स्टेशनसम्म एक दिनका लागि नेपाली सवारी साधन लिएर
जान सकिन्छ । 'इन्ट्री प्वाइन्टबाट अस्थाई पास लिएका सवारी एक दिनका लागि
३ किलोमिटर भित्रसम्म जान पाउँछन्,' कमिश्नर कुमारले भने, 'थप अवधिका
लागि वीरगन्ज स्थित भारतीय महावाणिज्य दूतावासबाट अनुमति लिनुपर्ने छ ।'
ग्रामीण नाकाहरुमा प्रवेश अनुमति उपलब्ध गराउने व्यवस्था नगरिएकाले
इन्ट्री प्वाइन्ट राखिएका नाकाहरुबाट मात्र प्रवेश गर्न उनले बताए ।
कस्टमका सूचना अधिकारी अभिषेक कमलका अनुसार एक दिने पास निशुल्क उपलब्ध
गराइने छ । 'फर्किदा इन्ट्री प्वाइन्टमा पास कर्मचारीलाई फिर्ता
गर्नुपर्ने छ,' उनले भने, 'भारत भित्रिएका सबै सवारीको कम्प्युटरमा
अभिलेख राखिने छ ।'
नेपाल प्रवेश गर्ने भारतीय सवारीको हकमा यो नियम पहिले देखिनै लागू
गरिएको छ । नेपाल प्रवेश गर्दा वीरगन्ज भन्सार कार्यालयमा इन्ट्री गराई
पास लिएर आउने गरेका छन् । एकदिनमै फर्किदा शुल्क नलाग्ने व्यवस्था
गरिएको छ । त्यसपछि सवारीको प्रकार अनुसार शुल्क निर्धारण गरिएको छ ।
नयाँ नियमसँगै किनमेलका लागि रक्सौल लगायत विहारका सीमावर्ती बजारमा
निर्भर रहँदै आएका नेपाली उपभोक्तालाई केही कठिनाई उत्पन्न हुने
सर्वसाधारण बताउँछन् ।
'यसैपनि मूख्य नाका सुचारु भएको बेला आवागमनमा अप्ठयारो हुँदै आएको
थियो,' रानीघाटका अरुण चौधरीले भने, इन्ट्रीको सिस्टमले कठिनाई थपिने भयो
।' मोटरसाइकल र कार, जीपमा किनमेलका लागि आउने नेपाली ग्राहक घट्ने भन्दै
रक्सौलका व्यवसायीले चिन्ता प्रकट गरेका छन् । रक्सौलका पसलमा घरायसी
सामान, लत्ता कपडा, भान्साका सामग्री खरिद गर्ने अधिकांश नेपाली उपभोक्ता
हुने गरेका छन् ।
प्रतिक्रिया