जलवायु सम्मेलनका लागि विश्वका नेताहरु पेरिसमा

ले बर्गे (फ्रान्स), १४ मङ्सिर । विश्वका नेताहरु जलवायु
परिवर्तनसम्बन्धी सम्मेलनमा सहभागिताका लागि फ्रान्सको राजधानी पेरिसमा
जम्मा भएका छन् ।
विश्वका करिब १५० देशका नेताहरु सो सम्मेलनमा जम्मा भएका बताइएको छ ।
जलवायु परिवर्तनसम्बन्धी सम्मेलनमा सहभागिताका लागि उनीहरु त्यहाँ जम्मा
भएका हुन् ।
चीन, भारत, रसिया, संयुक्त राज्य अमेरिकालगायतका विश्वका शक्तिशाली
राष्ट्रका सरकारप्रमुखहरु सो सम्मेलनमा सहभागी हुने बताइएको छ ।
कार्बन उत्सर्जनका कारण भएको जलवायु परिवर्तनको असर कमगर्नेसम्बन्धी
विगतका वर्षहरुदेखि जारी रहेको भनिएको सम्झौतामा यस सम्मेलनमा हस्ताक्षर
हुने अनुमान गरिएको छ ।
सो सम्मेलनमा जम्मा भएका नेताहरुको सुरक्षाका लागि कडा सुरक्षा व्यवस्था
अपनाइएको छ । पेरिसमा यसै महिनाको मध्यतिर भएको आतङ्ककारी हमलामा परी
कम्तीमा पनि १२९ जनाको ज्यान गएको थियो ।
सो आक्रमण एक भयानक आतङ्कवादी हमला थियो । यस आक्रमणका कारण उक्त सम्मेलन
पनि सर्नसक्ने अनुमान गरिएको थियो ।
तर फ्रान्सले पछिल्लो समयमा आएर सो सम्मेलन कुनैपनि हालतमा नसार्ने
बताएपछि सम्मेलन आजबाट सुुरु भएको हो ।
नेताहरुले परिसमा मौनधारण गर्ने
आज सुरु भएको सो सम्मेलनमा सहभागी हुन फ्रान्स पुगेका विश्वका नेताहरुले
सो आतङ्कवादी हमलामा ज्यान गुमाएका नागरिकको स्मरण गर्दै मौनधारण गर्ने
कार्यक्रम रहेको छ ।
साथै ती नेताहरुले पेरिसमा आतङ्कवादी हमला भएको स्थानको पनि निरीक्षण
गर्नेछन् । उनीहरुलाई विभिन्न समय मिलाएर विशेषत सबैभन्दा धेरै नागरिक
मारिएको बाटक्लानमा पुगी सो मौनधारण गर्ने जनाइएको छ ।
बाटकलान नाट्यशाला सबैभन्दा बढी नागरिक शिकार भएको स्थान हो । सो
क्षेत्रमा पुगी विश्वमा आतङ्कवादका विरुद्धमा जारी युद्धको पक्षमा
ऐक्यबद्धता जनाउने कार्यक्रम रहेको पनि बताइएको छ ।
नेताहरु फ्रान्समा रहदासम्मका लागि पेरिस र वरिपरि व्यापक सुरक्षा
सतर्कता अपनाइएको छ । सुरक्षाका लागि पेरिसमा मात्र कम्तीमा दुई हजार ८००
जना प्रहरी खटाइएको जनाइएको छ ।
राष्ट्रपति ओबामाद्वारा श्रद्धाञ्जलि व्यक्त
यसैबीच अमेरिकी राष्ट्रपति बाराक ओबामाले पेरिसमा भएको आतङ्कवादी
हमलास्थल बाटकलानमा पुगी त्यसमा मारिएका नागरिकप्रति श्रद्धाञ्जलि व्यक्त
गर्नुभएको समाचार छ ।
जलवायु परिवर्तनका कारण हाल संसारमा देखिएको विश्वव्यापी उष्णता
कमगर्नेसम्बन्धी विश्व सम्मेलनका लागि फ्रान्स पुग्नुभएका राष्ट्रपति
ओबामा आजै पेरिस जानुभएको हो ।
राष्ट्रपति ओबामा सोमबार बिहानीपख अर्लि विमानस्थलमा अवतरण गर्नुभएको
थियो । त्यसलगत्तै उहाँ उक्त आतङ्कवादी हमला भएको स्थलमा जानुभएको थियो ।
राष्ट्रपति ओबामालाई फ्रान्सेली राष्ट्रपति फासाँ अल्याण्डले आजै सो
विमानस्थलमा स्वागत गर्नुभएको थियो ।
उहाँको यस स्थलको छोटो भ्रमणको यसअघि सूचना भने दिइएको थिएन । सुरक्षाका
कारणले उहाँको यस भ्रमणको बारेमा पूर्व सूचना नदिइएको बताइएको छ ।
गत नोभेम्बर १३ मा भएको हमलामा परी १२९ जनाको ज्यान गएको थियो । उक्त
हमलामा मारिएका १२९ जनामध्ये अधिकांश सोही कन्सर्ट हलमा मारिएका थिए ।
फ्रान्समा भएको सो हमलापछि विश्वमा आतङ्ककारी क्रियाकलापका विरुद्धमा
अमेरिका र फ्रान्स एक भएर लड्ने प्रतिबद्धता व्यक्त गरेका छन् ।
यी दुवै देशले सिरियामा आइएसका विरुद्धमा हवाई हमलालाई पनि निरन्तरता
दिएका छन् । जसका कारण सिरियामा हालैका दिनमा हवाई कारबाही तीव्र भइरहेको
छ । रासस÷एएफपी